Dellos primates lleven el calabre de los sos ñácaros con ellos meses pa espresar duelu

La investigación d'una bióloga de la Universidá d'Uviéu foi asoleyada por una prestixosa revista científica

Dellos primates lleven el calabre de los sos ñácaros con ellos meses pa espresar duelu. Ye unu de los descubrimientos d'Elisa Fernández Fueyo, bióloga pola Universidá d'Uviéu y coautora d'un estudiu sobre esti comportamientu. La investigación foi asoleyada por una prestixosa revista científica.

L'estudiu, el más llargu y rigorosu hasta la fecha qu'analiza esti comportamientu, atribúi'l tresporte de los cuerpos ensin vida de les críes por parte de les sos madres a una manifestación de dolor pola muerte. Ye una conducta que se da nes madres más nueves y que pue durar meses.

Sicasí, si la criatura muerre de manera traumática, por casu pol ataque d'otru animal, la madre abandona'l cuerpu. Créese que nesos casos la proxenitora entiende que nun va recuperar al so fíu, y toma'l camín que supón menos costu pa ella.

Pa facer esti estudiu, analizáronse 409 casos en 50 especies de primates.

La investigación foi asoleyada pola prestixosa revista Proceedings of the Royal Society B.