Asturies dobla'l númberu d'ayudes pa investigadores en centros internacionales

Búscase favorecer la movilidá del personal investigador que ta faciendo la so tesis doctoral

El Gobiernu d'Asturies dobló'l númberu d'ayudes pa investigadores predoctorales del programa Severo Ochoa que deseen facer estancies curties en centros internacionales medrando hasta 144.000 euros la partida prevista pa esta convocatoria p'atender toles solicitúes y favorecer la movilidá del personal investigador que ta faciendo la so tesis doctoral.

Anguaño recibiéronse 52 solicitúes, una cantidá que supón daqué más del doble del añu anterior, y una pergrán medría sobre les últimes convocatories, con 27 pidimientos en 2019, 22 en 2020 y 24 en 2021, aumentu que llevó al Executivu rexonal a aprobar una dotación estraordinaria de 43.960 euros pa cubrir tolos pidimientos.

Esti programa d'ayudes financia con un máximu de 3.000 euros estancies temporales d'ente unu y tres meses en centros d'investigación d'acreitada excelencia. Les persones beneficiaries tienen que cuntar yá con un contratu Severo Ochoa pa la formación n'investigación y docencia, mientres faen la so tesis doctoral.