Cada 48 hores hai tres ataques informáticos n'Asturies

Asturies ta clasificada pa tres grandes proyectos d'intelixencia artificial

Asturies rexistra una media de 1100 ataques informáticos en tres meses, según apaez nel informe de la cátedra Castroalonso de Ciberseguridá y Redolada Dixital.

La Radiografía del estáu de la ciberseguridá n'Asturies, que se presentó na Universidá d'Uviéu, reflexa que n'Asturies, nun trimestre, más de 19.000 dispositivos rexistren problemes. Per conceyos, Uviéu encabeza la llista.

L'informe analiza la situación de l'alministración, los conceyos, la Universidá d'Uviéu y tamién la empresa privada.

Concluyen na cátedra que les direcciones tán concenciaes, pero que fai falta más compromisu por parte de los equipos. La principal vía d'entrada de los hackers sigue siendo al traviés del corréu electrónicu.

Les empreses más pequeñes son les que tienen los sos dispositivos más comprometíos. Dende la cátedra Castroalonso afiten que num ye cuestión de tecnoloxía, que polo xeneral, fai falta más educación corporativa y cultura de la prevención.

Asturies ta clasificada pa tres grandes proyectos d'intelixencia artificial

La secretaria d'Estáu de Dixitalización y Intelixencia Artificial d'España, nuna entrevista en TPA Noticies Matinal, señaló que la candidatura d'Asturies pa ser sede de l'Axencia Estatal d'Intelixencia Artificial yera, técnicamente, de les meyores, pero que la decisión foi política.

La secretaria d'Estáu señaló que la sede ye un departamentu más de l'alministración, pero nun xenera actividá económica. Eso, afita, fáenlo les inversiones.

Nesti sen destacó la clasificación d'Asturies a tres grandes proyectos: el de ciberseguridá, dixitalización del patrimoniu históricu y el de turismu intelixente y de ximielgos dixitales.

Amás señaló que 3.800 pymes recibieron yá'l bonu dixital, con una inversión de 20 millones d'euros n'Asturies.​