Cinco doctores estrenen el programa de la Conseyería de Ciencia pa impulsar la creación d'empreses anovadores

Van recibir formación pa llanzar el so proyectu y un total de 10.000 euros pa ponelu en marcha

Empieza la formación de los cinco doctores que llograron les primeres ayudes del Principáu a la creación d'empreses anovadores. Tol mes de setiembre, el Centru Européu d'Empreses dará-yos sofitu pa ellaborar un plan d'empresa que-yos dexe poner en marcha los sos proyectos el próximu añu.

Cinco doctores estrenen el programa de la Conseyería de Ciencia pa impulsar la creación d'empreses nesti colectivu. Caún llogró 10.000 euros pa poner en marcha un proyectu como'l de 'Plaquetes pa ti', amestáu a la Finba, que desenvuelve bioproductos pal so usu en medicina rexenerativa y estética.

Nel Centru Européu d'Empreses van recibir formación pa concretar el so plan d'empresa. Una ayuda clave pa Fernando García, doctor n'Economía. El so sistema de xestión ta entá en fase inicial.

Más avanzáu ta InnoPort, un dispositivu de 20 quilos p'analizar l'agua de depuradores y empreses industriales.

Pendiente del rexistru ta Francesco Pazzi, doctor en Bioloxía, que quier bautizar a la so empresa de bébora derivao del té como 'Viva Komucha'.

Y col güeyu puestu nuna posible producción en masa tán los responsables d'un dispositivu, similar al mandu d'una Wii, que dexa diagnosticar la COVID-19 en media hora al traviés de la cuspia.

L'horizonte ye tener llistu'l plan d'empresa primero qu'entame avientu, cola idea d'arrincar el próximu añu.