Dexar el tabacu ensin ganar pesu de manera escesiva resulta vidable

Estudiu de la Universidá d'Uviéu nel que participaron persones con obesidá o sobrepesu

Un estudiu lideráu pola Unidá Clínica de Conductes Adictives de la Universidá d'Uviéu conclúi de manera preliminar que con un tratamientu psicolóxicu ye posible dexar de fumar ensin ganar un pesu escesivu ente persones que tienen yá sobrepesu o obesidá.

L'oxetivu principal del estudiu consistió n'evaluar la viabilidá del tratamientu, el preste de los participantes y la eficacia preliminar nel abandonu tabáquicu y control del pesu con un abordaxe psicolóxicu qu'influyó al empar sobro dambes cuestiones en persones con sobrepesu y obesidá.

Con esti propósitu, investigadores de la Unidá Clínica de Conductes Adictives llevaron alantre un ensayu clínicu aleatoriu pilotu ente setiembre de 2020 y febreru de 2021.

L'estudiu incluyó a 41 adultos, con una edá media de 52,73 años, nun porcentaxe llixeramente superior de muyeres qu'homes, que fumaben polo menos diez pitos al día y teníen un índiz de masa corporal de 25 o superior, esto ye, que carecíen sobrepesu o obesidá.