L'argayu de Tazones esplica'l retrocesu de la mariña xurásica d'Asturies

Investigación liderada pola Universidá d'Uviéu

L'argayu de Tazones llegó a recular hasta 15 metros nun mes, según l'análisis que llevó alantre per cuatro años un grupu de 15 investigadores de siete instituciones, lideráu pola Universidá d'Uviéu.

L'estudiu afonda nel comportamientu d'estes roques formaes nel periodu Xurásicu, qu'apaecen a lo llargo de 76 kilómetros de la mariña asturiana y son conocíes por allugar buelgues y restos de dinosaurios de gran relevancia.

Según los profesores del Departamentu de Xeoloxía de la Universidá d'Uviéu y coordinadores del estudiu, María José Domínguez Cuesta y Montserrat Jiménez Sánchez, dellos meses el desplazamientu de munchos puntos de control foi superior a un metru, llegando a movese más de quince metros nun mes.