L'Idepa va tresformase nuna Axencia de Ciencia pa impulsar l'I+D+i

La decisión respuende "a criterios de racionalidá" col envís d'evitar duplicidades

L'actual Institutu de Desenvolvimientu Económicu del Principáu (Idepa) va convertise na futura Axencia de Ciencia, Competitividá Empresarial y Innovación Asturiana (Accia-Asturies) pa reordenar, coordinar y impulsar el sistema d'I+D+i.

Esta midida necesitaría aprobar una llei. El so anteproyectu va salir a información pública y el Gobiernu espera aprobalu a lo llargo l'añu, que va contemplar tamién la incorporación del Serviciu Rexonal d'Investigación y Desenvolvimientu Agroalimentariu (Serida) a la Conseyería de Ciencia y va afitar un nuevu modelu de coordinación de les polítiques d'I+D+i biosanitariu.

Según informó la Conseyería de Ciencia, Innovación y Universidá, la decisión de crear la nueva Axencia a partir del actual Idepa respuende "a criterios de racionalidá" col envís d'evitar duplicidades nel sector públicu y aprovechar los recursos colos que yá se cunta pa construyir un nuevu modelu de gobernanza de la ciencia n'Asturies.