El Principáu merca un equipu de cardioloxía y unu de resonancia magnética

La compra finánciase con fondos europeos Next Generation XE del Plan d'Inversión n'Alta Tecnoloxía

El Conseyu de Gobiernu alcordó esti vienres invertir 1,1 millones d'euros nun equipu de resonancia magnética destináu al Hospital Monte Naranco, n'Uviéu, y otros 829.000 euros nun equipu de cardioloxía intervencionista (sala d'hemodinámica) nel Hospital Universitariu de Cabueñes.

Según detalla'l Conseyu de Gobiernu, esta compra finánciase con fondos europeos Next Generation XE del Plan d'Inversión n'Alta Tecnoloxía (Inveat) del Gobiernu d'España, que dexa la meyora de les máquines del sistema sanitariu públicu pa favorecer el diagnósticu d'enfermedaes oncolóxiques, neurodexeneratives, cróniques y cardiovasculares n'estaos tempranos.