Les ayudes a la investigación d'escelencia van xenerar 130 contrataciones

Suponen una cuantía de 8,7 millones d'euros y va beneficiar a 56 equipos

La convocatoria d'ayudes pa financiar la investigación d'escelencia n'Asturies, que suponen una cuantía de 8,7 millones d'euros, va beneficiar a 56 equipos nos que trabayen 1.075 persones. Valórase que cerca de 130 van ser nueves contrataciones.

El financiamientu, xestionáu al traviés de la Fundación pal Fomentu n'Asturies de la Investigación Científica Aplicada y la Tecnoloxía (Ficyt), supón una inyección económica hasta 2023 pa los grupos escoyíos al traviés d'un procesu d'evaluación de l'Axencia Estatal d'Investigación (AEI), según informó'l Gobiernu.

Les cuantíes van dende daqué menos de 100.000 euros hasta más de 220.000 euros y unu de los indicadores relevantes na concesión de les ayudes ye'l númberu d'investigadores de manera que la metá de los equipos beneficiarios cunten con más de 20 miembros ente'l so personal investigador y en dellos casos ronden el mediu centenar.