Los neandertales del Sidrón siguen dando pistes del nuestru orixe

Un estudiu revela antigües hibridaciones ente neandertales y Homo sapiens

Un estudiu sobre les secuencies xenétiques del cromosoma Y (masculín) revela una mayor asemeyanza xenética ente los neandertales y l’home modernu, Homo sapiens, que colos denisovanos, lo que dexa a estos como una raza d’una raíz más antigua pa esti marcador xenéticu.

L’estudiu, asoleyáu güei, xueves, por Science, cuenta cola participación d’investigadores españoles del Conseyu Superior d’Investigaciones Científiques (CSIC).

L’equipu internacional, nel que participen miembros de la Universidá d’Uviéu, analizó les secuencies xenétiques del cromosoma Y (cromosoma sexual masculín) sacaes de tres fósiles de neandertales y dos de denisovanos, un tipu humanu que vivió en Siberia, mui venceyáu evolutivamente colos primeros.

De les tres amueses neandertales analizaes, una vien del yacimientu asturianu d’El Sidrón y afita la so relevancia internacional.