Nordés, la primer operadora móvil de telefonía de la contorna d'Avilés

Un serviciu cercanu, con atención personalizada n'asturianu y castellán

A pesar de la difícil situación económica, dos mozos avilesinos punxeron a funcionar la primer operadora móvil de telefonía de la contorna d'Avilés. Sol nome de Nordés escuéndese muncha ilusión, aseguren estos mozos entamadores.

Nordés ye la primer operadora de telefonía móvil de la contorna d'Avilés, allugada nel Centru d'Empreses de La Curtidora. La propuesta d'estos mozos entamadores pasa por dar un serviciu cercanu, atendiendo a los sos veceros n'horariu d'oficina y de forma personalizada.

Amás rellaciónense con ellos n'asturianu y castellán, daqué que se ve nes sos factures y a la hora de definir les sos tarifes.

La empresa ta formada por dos persones, pero Nordés naz con voluntá de medrar y afitar sedes n'otros puntos d'Asturies.

Pel momentu tán editando los 'flyer' y cartelería. La so intención ye averase al mayor númberu de families, ufiertando la so propuesta al traviés de folletos que van dexar nos buzones de les viviendes.