Dos alumnos de la Escuela de Mines d'Uviéu ganen el prestixosu concursu EDPR University Challenge

Una propuesta p'almacenar enerxía anovable nes mines soterrañes que yá nun se dediquen a la producción

Dos alumnos de la Escuela de Mines d'Uviéu recién graduaos ganaron un prestixosu concursu, cola so propuesta p'almacenar enerxía anovable nes mines soterrañes que yá nun se dediquen a la producción. Ye la cuarta vegada que la Escuela se presenta a estos premios, pero la primera que los sos alumnos son ganadores.

Son los meyores estudiantes de la so promoción y sumando los sos trabayos fin de grau ellaboraron un proyectu ganador. Un sistema novedosu p'almacenar la enerxía anovable y poder usalo nos momentos nos que nun hai nin vientu nin sol. Un proyectu que-yos valió'l trunfu nel concursu EDPR University Challenge.

La so posible aplicación a la realidá na mina de Lieres y l'estudiu económicu qu'acompaña a la idea son, pa la so profesora Almudena, les claves pa destacar sobro'l restu de finalistes d'España, Brasil y Portugal. El concursu desenvolvióse 'online' y n'inglés, una esperiencia que dicen foi bien granible pa ellos y qu'acabó de la meyor manera posible.

Per delantre, siguir deprendiendo y esfrutar del premiu. Un viaxe al trubiecu de la tecnoloxía, Silicon Valley, pa recibir un cursu y perfeccionar un modelu de negociu pa la so idea.

Y mientres s'abren les fronteres, Guillermo y Héctor siguen los sos estudios de máster na Escuela de Mines.