Restos xurásicos en La Playa España

L'equipu científicu del MUXA recupera galeríes d'invertebraos xurásicos de 152 millones d'años

L'equipu científicu del Muséu del Xurásicu d'Asturies (MUXA) recuperó esti miércoles dos grandes bloques d'arenisca con galeríes d'invertebraos xurásicos, con una edá aproximada de 152 millones d'años, nos cantiles de La Playa España, xunto al pueblu de Quintes (Villaviciosa).

Según informó'l MUXA, les superficies d'estos bloques amuesen abondes madrigueres con forma d'U, trazáu irregular, disposición horizontal a subhorizontal y ornamentación tresversal, producíes por una variedá de crustáceos o de guxanos xurásicos.

Esti tipu d'estructures conócense col nome de Rhizocorallium y tán davezu n'ambientes costeros y marinos de poca fondura. El so trazáu pue ser rectu, sinuosu o n'espiral.