Up Intelligence exemplifica la crecedera de les startups n'Asturies
Esta empresa d'intelixencia artificial triplica la so plantiya n'añu y mediu
Dende un sistema xestor pa conocer la información sobro los visitantes d'una ciudá, a una pesllera intelixente o un llápiz del dolor pa facilitar el trabayu de los médicos. Son dalgunes de les ferramientes que desenvuelve una empresa asturiana teniendo presente que la intelixencia artificial cada vez tien más aplicaciones na vida real.
La empresa d'Oscar Cosido acaba de recibir el premiu Impulsa a la Meyor Empresa Cultural y Creativa. Up Intelligence, con sede en Xixón, exemplifica la crecedera de les startups n'Asturies, yá que n'añu y mediu cuasi triplicó'l so personal.
La mayor parte del so volume de negociu vien d'Italia, onde yá cunten con oficina y alcuerdos con universidaes. Entamaron aplicando idees innovadores y llevando realidá virtual y intelixencia artificial a técniques pa evitar qu'apaezan patoloxíes en monumentos o que los edificios nun se colapsen en casu de terremotu, y tamién crearon una llave intelixente.
Trabayen en diseñar tecnoloxía pa faer más fácil la vida. Agora dan un pasu más na automatización desenvolviendo un llápiz que detecta'l dolor de los pacientes.
Poro, esta startup va entamar a ayudar a otres empreses basándose na so esperiencia. Asesoraránlos pa faer prototipos y medrar la so producción.