Los ganaderos que sirven lleche a Danone desconocen cómo va ser el so futuru

El comité d'empresa de Danone en Salas va retomar les negociaciones cola dirección mañana

El zarru de Danone non solo afecta a los emplegaos directos, tamién a los ganaderos qu'apurren la lleche a la multinacional. En principio, dende la empresa de yogures aseguraron que la recoyida de la materia prima, va siguir, pero desconocen cómo va ser cuando Danone zarre les sos instalaciones en Salas.

José Ramón García ye unu de los 33 ganaderos a los que Danone recueye la lleche. Tien una cabaña de 160 reses, 55 d'elles pa catar, que dan unos 600.000 llitros de lleche al añu.

Asegura que, va tiempu, esistía'l rumor del zarru de Danone, pero esperaben que la noticia nun llegara. Anque la empresa comprometióse a siguir recoyendo la lleche, desconoz cómo se va faer.

José Ramón vive nel conceyu de Salas, polo que ve esti zarru como una noticia pésima pa la zona.

Anque quedría tar na manifestación pol zarru de Danone, nun va poder dir, yá que ye a les 20:00 cuando los ganaderos tán en plena xera.

El comité d'empresa de Danone en Salas va retomar les negociaciones cola dirección mañana

El comité d'empresa va axuntase mañana, el miércoles y el xueves cola dirección de la compañía. La selmana pasada, la firma taba dispuesta a vender les instalaciones a un proyectu alternativu.

El Gobiernu del Principáu y la Cámara de Comerciu d'Uviéu amosáronse dispuestos a ayudar na busca d'un posible inversor que caltenga actividá y empléu na contorna.

Los trabayadores de Danone convocaron, pal xueves, una manifestación escontra'l zarru.