EDP estudia alternatives pal nuevu escenariu enerxéticu de transición ecolóxica

La compañía tien intención de pesllar el grupu I de la térmica d’Aboño en 2020

EDP tien intención de pesllar el grupu I de la central térmica de carbón d’Aboño (Asturies) a mediaos de 2020 y siguirían funcionando les d’Aboño II y Soto Ribera, que son les plantes nes que fizo inversiones p’adaptales a la nueva normativa ambiental europea.

El conseyeru delegáu d’EDP n’España, Rui Teixeira, dixo esti miércoles nun alcuentru con medios de comunicación en Madrid que si nada camuda Aboño I pesllaría.

Nel casu de los grupos en qu’EDP fizo inversiones en desnitrificación y desulfurización -Aboño II y Soto Ribera III-, Teixeira señaló que funcionarán "mientres el mercáu lo xustifique".

Sicasí, dixo que se ta estudiando pa estes plantes de xeneración eléctrica por carbón, si técnica y económicamente tien sentíu un cambéu de combustible pol que’l carbón puea ser sustituyío por residuos o biomasa.

Amás, señaló que la compañía ta pensando si n’Asturies podría haber una evolución nestes plantes pa la xeneración con gas, anque pa garantizar la continuidá de les infraestructures, habría qu’algamar una conclusión "favoratible" nesos estudios.

Teixeira dixo que nun tien que pesllase una tecnoloxía por decretu, por una decisión alministrativa, porque güei hai un mercáu competitivu y tien que ser el mercáu’l que decida.

Señaló qu’EDP caltién les sos plantes de carbón cumpliendo coles meyores práctiques medioambientales y la compañía invierte pa caltener la so flexibilidá y eficiencia.