Arcelor saca güei'l primer cok siderúrxico n'ocho años en Xixón

La multinacional calcula que les partícules de polvu veránse minimizaes en más del 70%

El primer cok siderúrxico sal güei de les nueves bateríes d'Arcelor en Xixón, dempués d'ocho años ensin producise esti tipu de combustible na factoría xixonesa.

Col desfornáu de güei, la multinacional vuelve a desendolcar n'Asturies tol procesu siderúrxicu. Nos meses vinientes, dirán activándose los 45 fornos dempués de dellos años d'obres.

La reconstrucción de les bateríes de la factoría de Xixón, zarraes en 2012, supunxo una inversión de más de 150 millones d'euros.

Un total de 900 persones trabayaron tres años p'acabar les obres. Les instalaciones inxerten lo último en tecnoloxía p'amenorgar y meyorar la captación d'emisiones.

Nel casu de les partícules de polvu, les PM10 y PM 2,5, la multinacional calcula que se verán minimizaes en más del 70%.

La puesta en marcha de la segunda batería, idéntica, llegará en primavera. Con ella, algamaráse una capacidá máxima de producción de 1.100.000 tonelaes añales de coque, 300.000 menos que les recién apagaes instalaciones d'Avilés, pero suficientes, espliquen dende la compañía, p'abastecer dafechu los fornos altos.

Y ye que menguarán el so consumu gracies a l'inxerimientu d'un nuevu combustible de gas de coque, que va inxertase nos meses vinientes.