Medra un 12% el númberu de trabayadores estranxeros n'Asturies

Munchos son estudiantes, que dexaron los estudios cola pandemia

El númberu d’estranxeros afiliaos a la seguridá social medró n’Asturies l’añu pasáu un 12%. Son 1.838 trabayadores más que l’añu anterior. Y la pandemia ta tres de bona parte d’esos contratos.

Según les ONG que trabayen con inmigrantes, en munchos casos son estudiantes que quedaron atrás y nun pudieron caltener el ritmu de los sos estudios por mor de les clases online. Suspendieron asignatures y quedaron en situación irregular. Pa siguir n’España, busquen trabayu y puen regularizar la situación por afitamientu social.

Abdou ye ún d’esos 1.838 inmigrantes qu’algamó un contratu de trabayu n’Asturies nel últimu añu. Dempués d’un percorríu per dellos países va un llustru llegó a Asturies y buscó trabayu como costureru, lo que meyor sabe facer dende que so padre lu enseñó en Senegal, cuando tenía nueve años.

Tuvo qu’esperar los tres años afitaos pa poder trabayar con contratu. Cuando lo algamó llegó la pandemia y despidiéronlu.

Agora algamó otra vuelta trabayu nun taller de tapicería. Ta mui contentu porque diz que les condiciones son bones y si tien munchu trabayu y queda más tiempu, páguen-ylu, daqué a lo que nun taba acostumáu.

El so xefe, tamién inmigrante, reconoz que-y gusta ayudar a los que llegaron como él, pero qu’amás nesti casu, Abdou ye mui bonu nel so trabayu.

Con esti trabayu, Abdou alganó anovar la so tarxeta pa quedar n’Asturies, polo menos dos años más.