Entamadores asturianos que saquen alantre los sos negocios en tiempos de pandemia

Venta online y distribución a pequeñes tiendes, clave del ésitu de los sos proyectos

En metá de la pandemia entamadores asturianos supieron sacar alantre nuevos negocios o rellanzar los que yá teníen. Ye'l casu d'Alma Avellana, The Woods Lab Ecosistema y Ablana Cosmética. La clave del so ésitu, l'apueste poles redes sociales y la venta a pequeñes tiendes pa la so posterior distribución.

Alma Avellana ye un obrador 100% artesanal. Los ingredientes de la so repostería son ecolóxicos, de kilómetru cero y de comerciu xustu. Los primeros tres años fueron difíciles, confiesa la so creadora, Andrea García.

Asitiada en zona rural, les sos ventes amenorgaron a pequeñes tiendes y feries. Al regresu d'una en Bilbao tuvo a nada de dexalo. Apostó pola tienda online y les redes sociales.

Ablana Cosmética nació'l pasáu branu. Celia Serrano, bióloga madrilana, decatóse de la calidá del aceite de l'ablana asturiana. Camudó entós el CSIC y l'estudiu del ranavirus nos anfibios de Picos d'Europa por Cabranes, y creó equí una llinia cosmética a partir d'ingredientes naturales.

En plena pandemia, tampoco podía vender en mercaos y feries, asina que se volcó tamién en pequeñes tiendes y la venta per Internet.

The Woods Lab naz del interés del so creador pola xardinería. Edgar Consuegra piensa ecosistemes en botelles de cristal, onde les plantes fabriquen el so propiu alimentu gracies a la fotosíntesis. Cuando los sos diseños empiecen a tener ésitu ente los amigos, plantega vendelos.

El verdaderu cambéu vien cuando la so actual socia decide amosar les sos creaciones n'Internet, ensin tener nin idea de la so repercusión.

Testáu'l mercáu al traviés de les redes sociales l'oxetivu esti mes ye yá abrir la tienda online y sacar al mercáu les sos creaciones.