Práctiques abusives de la banca dixital

Les quexes de los consumidores medren un 25%

La pandemia valió d’escusa pa impulsar la dixitalización de la banca y la radical mengua de l’atención presencial al veceru, lo que favorez práctiques abusives y la indefensión de los usuarios más vulnerables, denuncia la Xunión de Consumidores. Les quexes y reclamaciones por esti motivu medraron un 25%.

Veceros mayores o que tienen torgues pa desenvolvese nel mediu dixital son los que más sufren la radical mengua de l’atención presencial nos bancos. Casos como’l d’un usuariu con párkinson que, incapaz d’usar el caxeru, atopóse con que tampoco podía sacar perres na ventana.

Otru exemplu: una medría nes comisiones d’una cuenta de les que’l veceru, una persona mayor, ye infomáu namás pela vía dixital.

Al final nin s’entera de los cambeos nin tien capacidá de rempuesta al nun poder tener atención personal.

La solución pasa, según la XCE, por medrar la protección llegal de los usuarios vulnerables de la banca equiparándola a los d’otros sectores.

Les quexes y reclamaciones derivaes de la mengua de l’atención personal al veceru medraron un 25% dende qu’entamare la pandemia. Esti tipu de reclamaciones suponen yá’l 20% de toles venceyaes cola banca.