La empresa xixonesa Espiral participará en xunu nes maniobres tecnolóxiques de la OTAN

Proactivanet, un software que probará la seguridá de los sistemes informáticos d'exércitos de 30 países aliaos

Una empresa xixonesa d’inxeniería informática participará en xunu nes maniobres tecnolóxiques de la OTAN pa probar la seguridá de los sistemes informáticos d’exércitos de 30 países aliaos. El software de la compañía asturiana dio’l saltu al sector de la Defensa, cada vegada más esmolecíu pola ciberseguridá.

Les Fuerces Armaes españoles usen tecnoloxía asturiana pa controlar la so rede informática. Agora probaránla nes maniobres militares de la OTAN, les mayores a nivel internacional, onde participen una trentena de países con miles de dispositivos electrónicos conectaos. Sedrá en xunu, en Polonia.

La empresa xixonesa Espiral ta tres d’esti productu, Proactivanet, tan popular nel so ámbitu qu’acabó por eclipsar el nome de la compañía. Son los únicos fabricantes n’España d’esti tipu de software qu’usen multinacionales como Orange.

La ferramienta dexa detectar los equipos informáticos, programes y servidores conectaos en rede, saber en tiempu real si tán funcionando bien y solucionar problemes, inxertos los de seguridá.

Esta empresa d’inxeniería informática lleva más de 20 años nel mercáu, la so facturación medra a dos díxitos en plena pandemia y coles nueves incorporaciones superarán el centenar de trabayadores. La so sede central ta en Xixón, pero cunta con oficines en Llatinoamérica y el so oxetivu ye ampliar el so negociu nos Estados Xuníos y Europa.