La pandemia medró'l desempléu n'Asturies un 21%, según un estudiu

L'impactu foi desigual según la zona de la comunidá

La pandemia del COVID-19 provocó una medría de la cifra de desempleaos n’Asturies d’al rodiu del 21,2 por cientu, anque’l so impactu foi desigual según la zona de la comunidá, según un estudiu fechu polos espertos del Observatoriu Rexonal REXOlab de la Universidá d’Uviéu.

Pa llegar a esta conclusión analizáronse les series mensuales del paru rexistráu nes oficines del Serviciu Públicu de Trabayu dende entamos de 2008 hasta febreru de 2020 col envís de sacar los patrones qu’ayuden a describir el so comportamientu y a predicir los sos valores futuros.

Darréu, comparáronse les cifres que saldríen d’estes predicciones ente marzu de 2020, cuando entamó’l confinamientu pola pandemia, y avientu de 2021 coles cifres realmente rexistraes.

La conclusión ye qu’Asturies sumó nesi periodu un 21,2 por cientu más de desempleaos al respective de les cifres esperaes según les proyecciones feches dende los datos históricos.