Naz la 'Hackademia', un proyectu innovador nel CIFP d'Avilés

Primer promoción d'hackers asturianos con titulación oficial

Nel 2024, van demandase'l doble de puestos de trabayu en ciberseguridá que los profesionales cualificaos pa cubrir esos puestos. P'adaptase a esta nueva realidá, naz la 'Hackademia', un proyectu innovador recoyíu dientro de la única titulación oficial n'Asturies sobre ciberseguridá que s'imparte nel CIFP d'Avilés. Asistimos a una d'estes clases.

Los ciberataques tán a la orde del día y pa menguar el so impactu necesiten profesionales cualificaos.

Vamos a conocer a la primer promoción d'hackers asturianos y facémoslo nel únicu centru d'Asturies qu'imparte de manera oficial esti FP en ciberseguridá.

Javier Peña, tres dos años d'Inxeniería, decidió que la Informática yera lo suyo. Güei cúntanos que yá consiguió trabayu gracies a esti cursu. Y tamién Nicolás Del Río que fai xornaes maratonianes pa poder asistir a clas.

Cristina Santervás, la única moza del aula, sigue formándose porque, diznos, tien claro ónde quier tar.

El cursu, na so mayoría prácticu, ye una ponte hacia'l mundu llaboral, porque son conscientes de que'l futuru ta n'internet y los espertos cada vez son más mozos.

Dende la 'Hackademia' traten asina d'averar la conocencia a tolos públicos, nuna redolada cada vez más incierta.