La Xunión Europea afita un arancel climáticu que beneficia a la industria asturiana

Adrián Barbón celebra l'arancel climáticu

Les instituciones de la Xunión Europea llegaron güei a un alcuerdu pa poner un preciu a la güelga de dióxidu de carbonu (CO2) de les importaciones de fierro, aceru, cementu, aluminiu, fertilizante, electricidá o hidróxenu col envís de garantizar la igualdá de condiciones ente les empreses europees y les de terceros países.

Los Estaos miembros y el Parllamentu Européu pactaron la creación un "mecanismu d’axuste de carbonu en llende", que forma parte del paquete "Fit for 55" presentáu pola Comisión Europea en xunetu de 2021 p’algamar que’l bloque mengüe un 55% les sos emisiones de gas d’efectu ivernaderu al final d’esta década.

La midida busca que les compañíes europees que tán suxetes a les normes climátiques del bloque y tienen que pagar polos sos derechos d’emisión de CO2 nun tean nuna desventaya competitiva frente a los sos rivales de terceros países nos que les esixencies climátiques son menos ambicioses.