El domingu adelántase'l reló y a les 02:00 van ser les 03:00

El cambéu d'hora retrásase n'Europa

Los relós volverán adelántase 60 minutos na madrugada de mañana domingu, 28 de marzu, y a les 02:00, hora peninsular, van ser les 03:00, pa dar entrada al horariu oficial de branu, arrodiáu de discutiniu sobro los beneficios reales d'esti axuste que se produz dos vegaes al añu.

Dellos espertos na materia defendieron la necesidá d'afitar una hora y caltenela tol añu yá qu'estremar ente horariu d'iviernu y de branu "podría tener sentíu hasta fai 40 o 50 años pero non tanto agora", según esplica Ricardo Irurzun, d'Ecoloxistes n'Acción.

Pa Irurzun, por mor del últimu cambéu horariu "nun hai forma de comprobar si s'aforra o non enerxía", yá que nun esisten estimaciones "de forma bien estudiada" nos últimos años al respective.

Lo que sí ta comprobao ye que la variación d'hores de lluz que recibe'l cuerpu humanu afecta al so organismu y, anque s'adapta rápido a un cambéu d'esti tipu, cuando se fuerza por razones ayenes a la bioloxía "produzse una desregulación de los niveles hormonales" qu'implica, ente otres coses, un descensu de la melatonina o "hormona del sueñu", lo qu'afecta tanto al descansu como al rendimientu de la persona.

Asina lo confirmó l'espertu n'investigación neurovascular del Conseyu Superior d'Investigaciones Científiques (CSIC) Ricardo Martínez, quien tamién recordó qu'a les persones con trestornos psicóticos, como les que sufren de psicosis maniacodepresiva, "la primavera siénta-yos fatal, yá que'l so estáu d'ánimu empeora ente otres razones por tener más hores pa pensar".

El cambéu d'hora retrásase n'Europa

N'Europa, el cambéu d'hora retrásase. El Parlamentu Européu aprobó en marzu de 2019, con una peramplia mayoría, abolir esta práctica que se remonta al sieglu pasáu y punxo fecha pa que los estaos miembros decidieren qué usu horariu preferíen: el 1 d'abril d'esti añu pa quien quede na hora de branu, y ochobre de 2021 pa los que prefieran el d'iviernu.

A menos d'una selmana de qu'espire'l primer plazu, nada hai decidío. La falta d'un consensu claro podría faer, inclusive, -según dellos eurodiputaos- que decaiga la iniciativa. Y esta vegada'l cambéu d'hora llega tres un añu de restricciones a la movilidá impuestes pola pandemia.

Amás, cola entrada del horariu de branu llega la Hora del Planeta. A les 20:30 d'esta tarde, y per una hora, van apagase les lluces de miles de monumentos y edificios emblemáticos a lo llargo y anchu del planeta, un xestu pa concenciar sobro'l cambéu climáticu qu'anguaño se celebra, per segunda vegada, de manera dixital.