El borrador pal nuevu Estatutu Docente propuestu pol Ministeriu d'Educación nun convence a Suatea

El testu medra la carga burocrática de los docentes y afonda na desigualdá salarial, apunta'l sindicatu

El Ministeriu d'Educación quier que'l nuevu Estatutu Docente quede aprobáu esta llexislatura. Esta selmana empezaron les conversaciones colos sindicatos.

El borrador pal nuevu Estatutu Docente propuestu pol Ministeriu d'Educación nun convence a Suatea. El testu recueye 12 competencies pal profesoráu, lo qu'a xuiciu del sindicatu medraría la carga burocrática de los docentes y afondaría na desigualdá salarial.

Ye una de les cuestiones trataes nes xornaes 'Neolliberalismu y educación: La escuela pública en peligru', qu'entama'l sindicatu en Mieres, nes que tamién se sollertó de la degradación del aprendizaxe pola implantación nes aules del trabayu por proyectos.

Por eso cuestionen los estudios qu’avalen esti modelu que dicen solo ta al serviciu de les empreses. Y apuesten pol amenorgamientu d'hores llectives y de ratios p'ameyorar la calidá de la enseñanza.