Ruiz Repullo alvierte sobre la rellación ente l'acosu escolar y la violencia machista

La psicóloga recuerda que les redes son un espaciu más de la sociedá

La profesora de Psicoloxía de la Universidá de Jaén, Carmen Ruiz Repullo, esperta en violencia machista en mocedá, alvierte sobre la rellación ente l’acosu escolar y la violencia machista. Nuna entrevista en TPA Noticies Matinal, señaló que comparten una mesma base y una mesma causa.

L’acosáu o l’acosada tien que ver con un modelu que’l restu de la sociedá nun considera válidu, a mozos y moces que nun cumplen cola estética por exemplu o col rol de masculinidá de machu alfa.

Señala la importancia de los medios, que nun tienen que xustificar nenguna agresión y la importancia de tola sociedá, por exemplu, cuando nos llega per redes dalguna imaxen d’acosu o agresión.

Señala Ruiz Repullo que les redes son un espaciu más de la sociedá, non son el problema. Nun ye partidaria de prohibir, pero sí d’acompañar nel so usu y de llendar l’accesu a conteníos pornográficos, porque estos influyen na erotización de la violencia.