Enagás contribuirá coles sos capacidaes a la seguridá enerxética d'Europa

Arturo Gonzalo asegura que la planta d'El Musel "va dar una gran capacidá de recibir buques metaneros"

El conseyeru delegáu d’Enagás, Arturo Gonzalo, aseguró esti miércoles que contribuirán a la seguridá de suministru n’Europa cola "máxima collaboración y responsabilidá", poniendo a disposición "tola capacidá d’interconexón disponible y de recarga de buques" nes sos plantes de regasificación.

Nuna conferencia telefónica con analistes celebrada por mor del asoleyamientu de los resultaos del primer semestre, Gonzalo insistió en que l’alcuerdu políticu zarráu pola Xunión Europea p’aforrar gas y amenorgar la dependencia de Rusia amuesa que la flexibilidá "va ser clave pa que la solidaridá seya lo más efectiva posible".

Los ministros d’Enerxía de los Estaos miembros acordaron ayeri martes amenorgar, de forma xeneral, un 15% el so consumu d’esta materia prima, pero coles midíes qu’ellos escueyan y con una serie de derogaciones y escepciones a les que podrán acoyese.

La viniente entrada en serviciu de la planta loxística del cai xixonés d’El Musel "va dar una gran capacidá de recibir buques metaneros", señaló Gonzalo, qu’alvirtió que "entá hai una gran capacidá vacante d’usar el gasoductu virtual que conecta les plantes d’Enagás nel Mediterraneu a Italia".