Los motoristes refuguen l'usu de chalecos airbag pola so eficacia y preciu

Tráficu encamienta'l so usu

La DXT estudia modificar el reglamentu de circulación pa facer obligatorios los chalecos airbag pa motoristes. Pero la Unión Internacional pa la Defensa de los Motociclistes refuga esta imposición. Esti colectivu d'usuarios argumenta que la eficacia d'estos dispositivos ye meyorable y que'l so preciu ye mui eleváu.

Tán diseñaos pa protexer llombu, pescuezu y abdome. Por casu, un modelu electrónicu que s'activa en cuanto se cierra'l botón cimeru y tien una autonomía de 14 hores.

Tráficu sostién que los chalecos airbag van suponer un enantes y un dempués na seguridá de los motoristes y encamienta'l so usu. La DXT anunció que va incorporalos na equipación de la Guardia Civil. Un segundu pasu va ser revisar el reglamentu de circulación pa facelos obligatorios, daqué que refuga la IMU, la Unión Internacional pa la Defensa de los Motociclistes.

El colectivu considera qu'estos dispositivos de seguridá entá tienen marxe de meyora na so eficacia y denuncia que munchos d'ellos incumplen la normativa europea de seguridá. Amás el so preciu, que va ente los 500 y 1.000 euros, conviértelos n'artículos de luxu.

La IMU fizo una encuesta y pidió formalmente a Presidencia, a Interior y a la DXT que reconsidere imponer el so usu, pidimientu sofitáu pol 91% de los encuestaos.