'¿A dónde viajan las cacas?', primer llibru d'una vecina de Les Caldes

El llibru, que yá va pola segunda edición, quier ayudar a los pequeños a dir al váter

N’Uviéu, Lucía Álvarez, una vecina del pueblu de Les Caldes, acaba d'asoleyar el so primer llibru. Dedicáu al públicu infantil de dos a cinco años. Una historia qu’inventó pa la so fía y qu’acaba d’asoleyase va dos selmanes en forma de llibru autoeditáu. Yá agotó la primer edición y tien en marcha la segunda. La temática ye un problema avezáu nos más pequeños: el mieu a dir al bañu.

'¿A dónde viajan las cacas?' ye’l títulu del primer llibru qu’edita esta vecina del valle de Les Caldes. Una historia que quier ayudar a la reciella a perder el mieu a dir al váter, nel momentu que tienen que deprender a controlar los esfínteres enantes d’entamar a escuela.

Una forma divertida y entretenida pa que la reciella entienda un procesu natural. La historia yá se conoz en dalgunos colexos.

Lucía Álvarez animóse a autoeditalu y fízolo de forma online con una editorial estremeña.

La primer edición yá s’agotó y tien en marcha la segunda, que presentará na llibrería infantil 'El Búho Lector'.