La Wikipedia asturiana, segunda del mundu con más biografíes de muyeres en proporción d’artículos

Más del 34% de les biografíes son de muyeres

La Wikipedia n’asturianu nun dexa de medrar y namái en seis meses pasaron de 50.000 artículos en llingua asturiana a 74.000. Daqué qu’asitia a esta enciclopedia collaborativa inclusive penriba de llingües oficiales.

La Wikipedia asturiana ye la segunda del mundu con más biografíes de muyeres en proporción d’artículos.

Dende la muyer de más actualidá política a una de les cantantes de moda pasando per deportistes, científiques, o toa una figura de los derechos femeninos. Non solo importa la cantidá sinón que seya una ferramienta segura, de calidá y con equilibriu.

Más del 34% de les biografíes qu’ufierta son de muyeres. La Wikipedia asturiana ye la segunda del mundu con menor brecha de xéneru namái per detrás de la Wikipedia en galés.

Anguaño 10 voluntarios revisen la veracidá y faen artículos n’asturianu. Quieren qu’haya más collaboradores que s’axunten a esti proyectu nel que cualquiera pue editar un artículu, correxilu o medralu.