A la vanguardia nel arreglu de calzáu deportivo

Un zapateru tradicional de Villaviciosa, autorizáu pa reparar calzáu deportivo d'alta tecnoloxía

Un zapateru tradicional de Villaviciosa reinvéntase y asitia'l so pequeñu taller a la vanguardia n'España n'arreglu de calzáu deportivo. El so secretu, afirma, una bona base técnica y un deséu incansable por evolucionar.

Alfonso Martínez ta ente la docena de zapateros del nuesu país autorizaos pa reparar calzáu deportivo d'alta tecnoloxía tanto español como européu. Grandes marques tán reconociendo'l so trabayu.

Foi'l so enfotu personal el que lu llevó hasta les marques, reticentes nun principiu, a que pudiera reparar los sos productos. Tuvo que facer cursos formativos, buscar distribuidores y inclusive formes pa calzáu técnico y d'última xeneración.

Nun hai más secretu afirma, que la esmolición, el gustu pol oficiu y facer bien les coses. La tresmisión de conocencia de so güelu y de so padre fueron fundamentales asegura.

El so últimu proyectu, una caravana de 1960 cola que va a les carreres de monte d'Asturies y contorna, pa recordar a los corredores que'l calzáu más complexu pue llegar a reparase.