Muerre Fidel Álvarez Garaot, patrón del Esmeralda Tercero

Taba faenando na costera del bonitu cerca de la Bretaña francesa

Disgustu nel sector pesqueru asturianu tres el fallecimientu, d'un infartu, n'alta mar esta pasada madrugada del conocíu armador pixuetu Fidel Álvarez Garaot. El patrón del Esmeralda Tercero, de 46 años, morrió d'un ataque al corazón mientres faenaba na costera del bonitu cerca de la Bretaña francesa.

Natural de Ouviñana y con una familia mui venceyada a la mar, Fidel partiera'l martes pela tarde a la costera col so hermanu que diba n'otra embarcación. Dambos barcos, col cuerpu del muertu, viaxen agora pal cai d'Avilés onde ta previsto que lleguen esta madrugada.

El llevantamientu del calabre va ser nel cai avilesín.

Álvarez Garaot foi unu de los impulsores del conocíu como 'campanu de la mar,' al faese los 10 últimos años coles captures de los primeros bonitos de la temporada que se puyaben na rula d'Avilés.

Dende RTPA sumámonos a les condolencies pol fallecimientu de Fidel Álvarez Garaot, un gran amante de la mar que siempres collaboró de manera desinteresada p'amosar, na tele de tolos asturianos, la importancia y el noyu del sector pesqueru. El pasáu 12 de marzu protagonizó'l nuesu perfil del Conceyu a Conceyu.