Piñán sorraya que la calidá de la lliteratura n'asturianu 'deféndese sola'

Inauguración de la 42 Selmana de les Lletres Asturianes en Mieres

La conseyera de Cultura, Política Llingüística y Turismu, Berta Piñán, afirmó esti llunes que la calidá de la lliteratura n'asturianu "deféndese sola" gracies al camín "de calidá y escelencia" que percorrió a lo llargo de les últimes décades.

Piñán, quien inauguró güei la 42 Selmana de les Lletres Asturianes, nun actu celebráu na Casa de Cultura Teodoro Cuesta de Mieres, tamién dio puxu a "la función perimportante" que tuvo la lliteratura n'asturianu nel procesu de normalizacion llingüística.

La Selmana de les Lletres Asturianes ta dedicada anguaño al escritor y artista mierense Nel Amaro, del que la conseyera destacó la so figura como "axitador cultural", y el so legáu de relevante influencia pa xeneraciones posteriores.

Nel actu d'apertura de la Selmana de les Lletres presentóse'l llibru "Pruebes d’autor: les siete vides de Nel Amaro", coordináu por Xandru Fernández, proxectóse un documental sobre l'escritor mierense y amás inauguróse una esposición sobre la so figura.

Piñán detalló tamién el restu de la programación de la Selmana que, amás de los actos d'homenaxe a Nel Amaro, inclúi'l "Conciertu de les Lletres", nel que la Orquesta Sinfónica del Principáu (OSPA) va interpretar pieces de compositores asturianos; l'Homenaxe ás nosas lletras, que se va celebrar na Casa de la Cultura d'As Figueiras (Castropol), o'l sestu concursu de microrrellatos improvisaos n'asturianu, que va tener llugar el vienres, Día les Lletres Asturianes, en Llaboral Centru d'Arte.