Seis películes inédites de la Guerra Civil n'Asturies

Les películes formen parte del archivu de l'axencia americana de noticies Hearst

Salen a la lluz grabaciones inédites de la Guerra Civil n’Asturies. Les películes formen parte del archivu de l’axencia americana de noticies Hearst.

Na so colección, l’axencia de noticies acumula centenares de películes de la Guerra Civil española. Dalgunes d’elles filmaes n’Asturies. Nes imáxenes pue vese, por exemplu, la entrada de les columnes gallegues n’Uviéu o a les tropes del coronel Aranda en Pola de Gordón.

Hearst donare toes estes películes a la Universidá de California, onde tuvieron almacenaes hasta va poco. Agora la fundación ensin ánimu d’arrequecimientu The Packard Humanities Institute recuperó esti material y ta encargándose de dixitalizalu. La investigadora asturiana Silvia Ribelles ye una de les espertes que trabaya nel procesu.

Les películes punxéronse a disposición pública y puen consultase de baldre nel archivu online de la entidá.