Homenaxe en Pravia a les víctimes de la fuexa d'Agones

Emotivu actu por 'La vuelta a casa d'Ángel'

Homenaxe del Conceyu de Pravia y de l'Asociación pa la Recuperación de la Memoria Histórica a les víctimes de la fuexa d'Agones. Nél actu fízose entrega a la familia de los restos d'Ángel Fernández, fusiláu por falanxistes na Nuechebona de 1937.

Ángel y Jesús reciben el féretru colos güesos de so tíu, arropaos pol restu de miembros de la familia. Nel bolsu de la so chaqueta atoparon un mecheru y una piedra d'afilar. Son los últimos detalles d'una hestoria que llega al final ochenta y dos años dempués.

'La vuelta a casa d'Ángel', títulu del homenaxe, nun fuera posible ensin l'enfotu personal del sobrín pequeñu, Ángel, la corporación municipal de Pravia, la Fundación Aranzadi y l'Asociación pa la Recuperación de la Memoria Histórica. Fueron estos dos últimos los que ficieron les escavaciones y los análisis antropolóxicos.

L'únicu pesar ye que Manuel, fusiláu xunto al so hermanu Ángel la nuechebona del 37, nun pudo ser atopáu.

L'actu nel qu'intervinieron la poeta Ana Vanessa Gutiérrez, Xosé Ambás y miembros de l'Asociación pa la recuperación de la memoria histórica convirtióse nun homenaxe a tolos represaliaos de la fuexa de La Canalona n'Agones.