L'Hospital Valle del Nalón espón 27 cuadros del pintor uvieín Nigro

Una cesión permanente de la familia del artista

L'Hospital Valle del Nalón, centru de referencia del área sanitaria VIII, acueye una esposición permanente de 27 pieces del pintor uvieín Francisco Casariego Hernández-Vaquero, conocíu artísticamente col nomatu de Nigro.

L'amuesa forma parte del programa Sanidá Amable, una iniciativa cola que se trata d'humanizar los espacios asistenciales pa facelos más cálidos y confortables pa los pacientes y los sos familiares, según informó la Conseyería de Sanidá nun comunicáu.

El conseyeru de Sanidá, Francisco del Busto, visitó esta mañana les obres del artista plásticu xunto col xerente del área sanitaria VIII y dellos herederos del pintor que cedieron de baldre les obres col fin de difundir el trabayu del artista.
Los 27 cuadros roblaos de Nigro espuestos nel Hospital Valle del Nalón son pieces de formatu pequeñu y medianu, sobremanera en tablex y en lienzu, vinculaos cola escuela abstracta d'arte européu.

La mayor parte de les obres tán colgaes nos pasiellos, vestíbulos y otros espacios públicos del centru hospitalariu como'l salón d'actos.

Francisco Casariego Hernández-Vaquero nació n'Uviéu en 1919, ciudá na que vivió cuasi dafechu hasta que finó en 2010.
Educáu nuna familia onde s'amiestaba l'arte y la técnica, Nigro tuvo atentu dende la so mocedá al devenir de les artes plástiques.

Foi una visita al MOMA de New York nos años cincuenta la qu'actuó como catalizadora de la so sensibilidá artística al quedar ablucáu poles obres de los grandes pintores espresionistes abstractos norteamericanos.

Tres algamar la titulación d'Inxenieru Industrial, y darréu'l doctoráu, desendolcó esta profesión delles décades nuna empresa hidroeléctrica asturiana, de la que, col tiempu, llegó a ser director.

La so dedicación total al arte y la so trayectoria como pintor entamaron tres la so xubilación como inxenieru.
Nesta tercer parte de la so vida, la so intensa y apasionada xera artística concretóse en dellos cientos de cuadros, munchos d'ellos de gran formatu, y en delles muestres individuales y colectives.

Anguaño, hai cuadros de Nigro nel Muséu de Belles Artes d'Uviéu y nes sedes de delles empreses y instituciones asturianes.