Asturies celebra'l llevantamientu escontra Napoleón

Asturies Laica y l'Atenéu Republicanu defenden que'l 25 de mayu seya'l Día d'Asturies

Ufierta floral de l’Asociación Asturies Laica y l’Atenéu Republicanu a los que llucharon na Guerra de la Independencia. Güei recuerden que’l 25 de mayu de 1808, la Xunta del Principáu proclamóse soberana y declaró la guerra a la Francia de Napoleón.

Les dos organizaciones defenden qu’esti 25 de mayu tendría que proclamse como’l Día d’Asturies.

Podemos asegura que nesta fecha histórica p’Asturies, el Gobiernu tien qu’ufiertar a los asturianos fechos y non solo banderes. Esixen al Executivu que nos 300 díes que queden de llexislatura cumplan compromisos pendientes, como la llei LGTBI, los compromisos sociales, como’l pagu de les ayudes al alquiler, o la reforma del Estatutu d’Autonomía.

Amuesa d’armes y uniformes de la dómina

Alumnáu del bachilleratu d’artes del Institutu Aramo d’Uviéu conocieron de primer mano cómo yeren los uniformes d’aquellos soldaos que declararon la guerra a Francia. Sofiándose en materiales de la dómina, l’Asociación de Recreación Histórico-Cultural d’Asturies cuntó-yos qué foi lo que pasó’l 25 de mayu.

El 9 de mayu de 1808 lleguen a Asturies les noticies del llevantamientu popular escontra los franceses en Madrid el día 2 y el 25 de mayo d’esi 1808, la Xunta del Principáu declara oficialmente la guerra a la Francia de Napoleón.

L’asociación utiliza los traxes y materiales de la dómina, resultáu d’años d’investigación en documentos históricos.

L’añu qu’entra, cuando estudien historia d’España, seguramente s’alcuerden de la poca precisión de los rifles, de los traxes escuros fechos con llana d’oveya xalda y, quiciabes, de por qué se celebra esta efeméride.