El Muséu Evaristo Valle, declaráu Bien d’Interés Cultural

Abrió les sos puertes al públicu’l 3 de marzu de 1983

El Muséu Evaristo Valle de Xixón, ún de los principales centros espositivos privaos esistentes n’Asturies, foi declaráu Bien d’Interés Cultural cola categoría de Monumentu pol Conseyu de Gobiernu celebráu la selmana pasada, según publica güei’l Boletín Oficial del Principáu.

La Fundación Muséu Evaristo Valle ta nuna propiedá asitiada nel barriu de La Redonda, na parroquia de Somió, que cunta con un nucleu de ciudá xardín nel qu’entovía se puen ver resclavos d’antigües villes de recréu de la burguesía y de la nobleza decimonónica, como la propia sede del muséu.

El conxuntu formáu pol edificiu principal, destináu sobre manera  a esponer la obra del pintor Evaristo Valle, y l’espaciu de xardinos que lu arrodia, tán protexíos pol Catálogu Urbanísticu de Xixón dende xunetu de 2010 y tramítase, amás, el so inxertamientu nel Inventariu del Patrimoniu Cultural d’Asturies.

L’orixe de la propiedá ta nuna antigua casa torre venceyada a una rama de la familia Menéndez Valdés de Corniana, y na primer metá del sieglu XIX tuvo calter rústicu, con partes de la mesma dedicaes al llabor, praos, güerta y pumarada.

En 1865, al finar los sos titulares, la heredá pasó a los sos herederos y quince años dempués foi mercada por William Penlington Mac Allister, vicecónsul inglés en Xixón, al que se-y  atribúi’l méritu d’acuriosar la propiedá creando xardinos al altor d’una finca de recréu burguesa.

Dempués d’adaptar el xardín al estilu victorianu, Penlington vendió la finca, que pasó a manes de dellos titulares hasta qu’en 1913, el “Banco Gijón”, que nesos momentos yera’l so propietariu, enayenó-yla  a José María Rodríguez, que la fizo la so residencia, xunto cola so muyer María Rodríguez del Valle, sobrina del pintor al que güei ta dedicáu este espaciu.

Al finar José María Rodríguez en 1963, la so vilba tuvo la idea de caltener viva la memoria y el patrimoniu artístico y personal de so tíu –(fináu en 1951)- creando un muséu na so propiedá y cuando finó, en 1981, dexó los sos bienes pa constituyir la Fundación Muséu Evaristo Valle, institución con calter benéficu docente.

El Muséu Evaristo Valle abrió les sos puertes al públicu’l 3 de marzu de 1983 y, amás de la obra espuesta nel edificiu principal, l’espaciu de xardinos que lu arrodia tresformóse tamién nuna esposición al aire llibre qu’acueye numberoses pieces escultóriques d’artistes contemporáneos.