La OSPA estrena n’Avilés "Onírico", del asturianu Gabriel Ordás

El compositor asturianu propón esplorar la llende ente realidá, suañu y ficción

La Orquesta Sinfónica del Principáu (OSPA) estrena güei, na Casa de Cultura d’Avilés, la obra "Onírico", del compositor asturianu Gabriel Ordás dientro d’un programa tituláu "Inspiración II" qu’inxerta tamién el conciertu pa vigulín en Re menor, op. 47, de Sibelius, y la suite Nobilissima visione, de Hindemith.

El conciertu, que se repetirá al día siguiente nel Auditoriu Príncipe Felipe d’Uviéu, cuntará con Rossen Milanov a la batuta mientres que’l concertinu de la sinfónica asturiana, Alexander Vasiliev, sedrá’l solista del conciertu pa vigulín de Sibelius.

Col so interés por esplorar les posibilidaes de la fantasía como forma musical, Gabriel Ordás (Uviéu, 1999) propón con "Onírico" esplorar la llende ente realidá, suañu y ficción con una pieza que tuvo’l so entamu nun suañu placenteru.

El compositor nun escuende la so atracción pol mundu de los suaños, les sonoridaes impresionistes y pol universu creador de Salvador Dalí y afirma que la so música tira al simbolismu, entendíu como’l deséu d’espresar en soníos l’orixe de la pieza.