Mafalda yá tien el so sitiu en Reconcos (L.lena)

Dende'l so allugamientu, el pueblu nun paró de recibir visites

El parque San Francisco d'Uviéu yá nun ye l'únicu llugar d'Asturies onde podemos sentanos cabo Mafalda. En Reconcos, en L.lena, tamién podemos visitar esti peculiar personaxe de Quino gracies a les manos de Quico Torre, qu'ellaboró una copia prácticamente exacta.

Fízola pa la so muyer Elena, fan absoluta de Mafalda, que pintó la estatua de madera. Dende'l so allugamientu nel pueblu nun pararon de recibir visites pa tomar fotografíes.

Desque se prexubiló, Quico Torre dedicóse a ellaborar a mano delles creaciones de madera. El procesu d'ellaboración del personaxe de Quino llevó-y namás un mes. Los detalles tallólos colos sos propios instrumentos nel taller que tien nel pueblu.

Desque espublizaron la semeya en Facebook va unes selmanes viéronse desbordaos ante les numberoses visites nun pueblu de malpenes una ventena d'habitantes. D'equí p'arriba Mafalda tamién tien el so sitiu en L.lena, y llueu va tener como acompañante al so amigu Felipe.