Avilés entama un nuevu maratón estraordinariu de donación de sangre

Va ser del llunes 5 al vienres 9 de xunu

L'Asociación de Donantes de Sangre d'Avilés y Corvera, el Centru Comuñal de Sangre y Texíos d'Asturies y el Conceyu d'Avilés entamen, del llunes, 5 de xunu, al vienres 9, un nuevu Maratón Estraordinariu de Donación de Sangre nel Palaciu Consistorial y nun autobús asitiáu na plaza d'España.

Ye la segunda ocasión en qu'esta cita se lleva alantre per estes feches, a les puertes del branu, complementando l'avezáu Maratón de Navidá que cada añu se fai n'avientu.

La cita foi presentada esti vienres pola conceyala de Ciudá Saludable en funciones, Lucía Fernández Ron, acompañada de la xerente del Centru Comuñal de Sangre y Texíos d'Asturies, María Teresa Díaz Campomanes, y el presidente de l'Asociación de Donantes de Sangre d'Avilés y Corvera, Carlos Vigil Blanco.