Berde, la creación artística como ferramienta pa tratar la salú mental

Un proyectu asturianu pa meyorar la calidá de vida de les persones con discapacidá intelectual

La creación artística como ferramienta pa tratar la salú mental y pa xenerar mayor autoconfianza nes persones con discapacidá intelectual. Esa ye la filosofía de Berde, un proyectu nacíu apocayá n'Asturies. Ta formáu por un grupu d'artistes con un llabor que nun ye'l d'enseñar, sinón el de crear espacios d'espresión al traviés del arte, que meyoren la calidá de vida de quien participe nesta esperiencia.

Tres 11 años trabayando en Madrid nel espaciu cultural Matadero, Mari Sol Álvarez decidió volver a Asturies cola llegada de la pandemia. De lo deprendío ellí naz Berde, un proyectu que quier dar un enfoque distintu a los talleres artísticos empobinaos a persones con discapacidá intelectual o problemes de salú mental.

Berde busca estrechar llazos con iniciatives similares que se desenvuelven n'otres partes d'Europa. L'oxetivu ye crear plataformes que dean visibilidá a los artistes que puean nacer d'esta iniciativa. Les primeres esperiencies tán siendo positives.

Cuatro artistes sumáronse al proyectu. El so papel nos talleres va más allá de lo puramente didáctico.

Los conceyos d'Avilés y Xixón fueron los primeros n'interesase por una iniciativa que yá busca un espaciu propiu pa siguir medrando.