El Conceyu de Xixón estudia la dixitalización y catalogación del archivu fotográficu de 'El Jardín'

La familia d'unu de los sos propietarios donó 8.000 fotografíes y mediu centenar de vídeos de la emblemática sala

Camilo Sexto, Víctor Manuel, Los Bravos y Joan Manuel Serrat son dellos exemplos d'artistes que tuvieron la oportunidá de triar les tables de la emblemática sala de fiestes 'El Jardín', en Xixón.

Les sos puertes cerráronse definitivamente'l pasáu branu, pero quien lu conocimos vamos guardar pa siempres na alcordanza les llargues nueches de fiesta. Unes alcordances qu'agora van formar parte tamién del archivu municipal, gracies a les 8.000 fotografíes y al mediu centenar de vídeos que la familia de Corsino García Rendueles, unu de los sos finaos propietarios, donó al Conceyu.

Rendueles yera un apasionáu de la fotografía, que nueche tres nueche dexó bon reflexu de la hestoria de ‘El Jardín’. Agora, el consistoriu estudia la so dixitalización y catalogación.

'El Jardín' yera la sala de fiestes cimera de Xixón. Una hestoria qu’entamó allá per 1950, en forma de merenderu y que foi evolucionando hasta convertise en referente a partir de los años 60.