El Belles Artes afaya l'arte sonoru de Juanjo Palacios

La pinacoteca asturiana apuesta per primer vegada pol son ente les sos propuestes espositives

El Muséu de Belles Artes va ufiertar hasta'l 18 de xunu nel patiu y planta baxa del Palaciu de Velarde un montaxe del artista, compositor y fonografista Juanjo Palacios col que la pinacoteca asturiana apuesta per primer vegada pol son ente les sos propuestes espositives.

"Sonidos propios" busca evidenciar y desvelar los soníos ocultos del Muséu de Belles Artes d'Asturies yá que Palacios nun quier revelar aquellos paisaxes sonoros más evidentes, como les pisaes o les voces de los visitantes que transiten pela pinacoteca, sinón que va más allá al rexistrar aquellos otros que resulten imperceptibles o invisibles, pero que formen parte de la vida del muséu.

A partir del usu de distintes ferramientes de rexistru sonoru d'alta calidá, como acelerómetros, micrófonos de contactu, sensores d'electromagnetismu y micrófonos d'alta sensibilidá, l'artista rexistró sones non siempres perceptibles pal oyíu humanu y, poro, atapecíos, pero non por ello carentes d'interés y guapura.