L'escritor Luis Sepúlveda muerre a los 70 años por coronavirus

Sepúlveda foi'l primer paciente diagnosticáu de coronavirus n'Asturies

L'escritor, guionista y director de cine chilenu afincáu en Xixón, Luis Sepúlveda, morrió esti xueves nel Hospital Universitariu Central d'Asturies (HUCA) d'Uviéu, onde taba ingresáu n'estáu grave desque'l pasáu 29 de febreru fuera diagnosticáu d'una neumonía acomuñada al coronavirus, informó un voceru de la familia.

Sepúlveda (Ovalle,1949), el primer paciente diagnosticáu de la COVID-19 n'Asturies, llevaba 48 díes ingresáu nel complexu hospitalariu uvieín, la mayor parte d'ellos conectáu a un respirador na Unidá de Cuidaos Intensivos, onde morrió a les 10:18.

L'estáu de salú del autor de 'Un viejo que leía novelas de amor' deteriorárase nes últimes selmanes al nun responder a los tratamientos socesivos nin a los antibióticos y sumar a la neumonía inicial otres patoloxíes y problemes acomuñaos a distintos órganos vitales, señalaron fontes sanitaries.