El vientu deslluz les famoses alfombres florales en Castropol

Munchos visitantes percuerren les cais onde sí foi posible faceles

El vientu desllució una de les grandes tradiciones de Castropol, les alfombres florales de Corpus. Los vecinos miraron al cielu delles hores esperando un cambéu, pero’l famosu vientu nordés impidió facer parte de les alfombres previstes y les que pudieron facese, llucieron con menos esplendor asegura Ovidio Vila, alfombrista.

A pesar d’ello, el sol animó a munchos visitantes a percorrer unes cais que cuntaron esti añu con elementos mui conocíos. Dalgunes alfombres cuntaron con diseños de barcos de vela llatina, qu’esti añu opta a convertise en Bien d’Interés Cultural Inmaterial. Nun faltó’l color del sal pintao, del pampiellu, de los pétalos. Una fiesta d’Interés Turísticu Rexonal que se recuperó en Castropol nos años 80, pero equí yá hai rexistros d’alfombres florales de va más d’un sieglu apunten Domingo Martínez, vecín de Castropol; Rosaura García, vecina d’Uviéu y María Dolores Castro, vecina de Xixón.

Dalgunos de los diseños previstos pa esti añu guardaránse pa facelos nel Corpus de 2025.