Empar Fernández gana'l 'Hammett' y María Larrea, el 'Rodolfo Walsh'

Cinco galardones pa destacar la importancia d'un xéneru, la novela negra

La novelista y profesora d'hestoria Empar Fernández (Barcelona,1962) ganó esti vienres el Premiu Dashiell Hammett que da la Selmana Negra de Xixón a la meyor novela negra escrita n'español en 2023 con 'El miedo en el cuerpo', una obra na que, según el xuráu, tresmite "la congoxa, el dolor y el mieu con una pluralidá de voces".

La novela de Fernández aborda'l desamparu d'un neñu autista de 7 años que se pierde nun parque y la so busca, dirixida pol inspector Tedesco, que lleva a afayar una trama criminal de tráficu de menores.

El Premiu Rodolfo Walsh a la meyor obra de non ficción de xéneru negru foi pa 'Los de Bilbao nacen donde quieren', de la bilbaína María Larrea, pola so orixinalidá narrativa y honestidá y valentía, cuntando de manera cruda, ensin cayer no llacrimóxeno, la so "hestoria familiar".

En 'Los de Bilbao nacen donde quieren', Larrea cunta la hestoria d'España dende los años 40 del sieglu pasáu hasta'l presente nes vivencies de la so familia.

El xuráu d'esti premiu tamién dio una mención especial a 'Hiroshima', del malagueñu Agustín Rivera, pol so "enorme valir documental, historiográficu y periodísticu".

Pela so parte, el Premiu Espartaco a la meyor novela histórica foi parar na XXXVII edición de la Selmana Negra a 'Castillos de fuego', del zaragozanu Ignacio Martínez de Pisón, mientres que'l Celsius a la meyor obra de ciencia ficción y fantasía recayó en 'Crisanta', del sevillanu Juan Ramón Biedma.

'Castillos de fuego' esnuda la fame, la penuria y l'estraperlu nuna semeya descarnada de la sociedá de la posguerra civil en Madrid ente 1939 y 1945.

Tres ganar el premiu Hammet en 2008 con ‘El imán y la brújula', Biedma foi premiáu col “Celsius” de Ciencia Ficción, un xéneru que trabayó tola so carrera lliteraria.

'Crisanta' ye'l nome d'una muyer qu'en Sevilla en 1936 intenta salir d'España fuxendo de la guerra y pa ello tien que llevar alantre un encargu peligrosu, l'afayu d'un trípticu del sieglu XVI que desapaeciera.

Amás, el Premiu Memorial Silverio Cañada a la meyor primer novela de xéneru negru foi pa 'Llevar en la piel', de la donostiarra Antonia Lassa, de quien el xuráu resaltó que se trata d'una novela “mui orixinal y entretenida, con un estilu mui personal".

'Llevar en la piel', que foi traducida al inglés, desenvuelve dos investigaciones paraleles, en Biarritz y París, del detective priváu Albert Larten, a partir del afayu d'una vieya millonaria que foi brutalmente asesinada.