Entama’l Ciclu d’Órganu de Santa María de Valdediós

El conciertu inaugural corrió al cargu del organista navarru José Luis Echechipía

Unes 250 persones asistieron al primeru de los tres conciertos del Ciclu d’Órganu de Valdediós, celebráu ayeri na ilesia del monesteriu de Santa María y entamaos pola Fundación José Cardín Fernández y la Fundación EDP.

El conciertu inaugural corrió al cargu del organista navarru José Luis Echechipía que, xunto con dalguna obra propia, interpretó un repertoriu con obres de los sieglos XVI al XVIII d’autores españoles como Sebastián Aguilera y compositores del barrocu inglés como Charles John Stanley y Maurice Gree.

Los siguientes conciertos en Valdediós sedrán los díes 3 y 10 d’agostu.

Un instrumentu históricu

L’órganu de Valdediós ye unu de los 11 órganos históricos declaraos meses atrás Bien d’Interés Cultural (BIC) pol Principáu d’Asturias.

Los espertos defienden el potencial musical y cultural d’estos instrumentos, que califiquen de verdaderos monumentos sonoros y demanden más cuidáu y protección pa ellos.

Con 877 tubos, la so estructura de madera pintada y decorada evidencien la so estética barroca y llama l’atención el so pequeñu tecláu, propiu de los órganos ibéricos.

Restauráu en 1985, cuando se-y punxo motor, la so única modernidá, 30 años dempués l’órganu mecánicu de Valdediós necesita una restauración, unes actuaciones que deben facese en tolos órganos históricos.

Unos 300 años dempués, l’órganu de Valdediós sigue sonando y dexando bien claro que nun ye un instrumentu del pasáu, sinón que quier tar presente nesti sieglu XXI.