Homenaxe al fotógrafu del rock, José González Roces

Dexa'l mayor archivu fotográficu de la música n'Asturies

José González Roces, el fotógrafu del rock n’Asturies, morrió darréu, ensin dar tiempu a los músicos asturianos a despidise d’él. Ficiéronlo güei en Sama, en Llangréu, con un cenciellu homenaxe, cargáu de palabres amables pal que dexa’l mayor archivu fotográficu de la música n’Asturies. ¿Cuántes fotos hai na colección de Roces? Namás él lo sabía.

Roces yera un incondicional nos conciertos n’Asturies y la so muerte dexó güérfanos a los músicos, a los que fotografió en décades.

Enxamás cobró por una semeya. La so ganancia foi, siempres, l’amistá de los que salíen nes sos fotos, que componen el meyor y más grande álbum de la música n’Asturies.

Xenerosidá, ye l’axetivu que más se repite pa definir a Roces. Un aficionáu a la fotografía y al rock, al que despiden cola boca pequeña, porque Roces nun marcha del too.